Чин освящения Саяно-Шушенской ГЭС, составленный по различным источникам архиепископом Абаканским и Кызылским Ионафаном

Протодиакон: Благослови, Высокопреосвященнейший Владыко.

Архиерей: Благословен Бог наш:

Чтец: Аминь. Приидите, поклонимся Цареви нашему Богу.
Приидите, поклонимся и припадем Христу Цареви нашему Богу.
Приидите, поклонимся и припадем самому Христу Цареви и Богу нашему.

И псалом 64:
Тебе подобает песнь, Боже, в Сионе, и Тебе воздается молитва во Иерусалиме. Услыши молитву мою, к Тебе всяка плоть приидет. Словеса беззаконник премогоша нас, и нечестия наша Ты очистиши. Блажен, егоже избрал еси и приял, вселится во дворех Твоих. Исполнимся во благих дому Твоего, свят храм Твой, дивен в правде. Услыши ны, Боже, Спасителю наш, упование всех концей земли, и сущих в мори далече, уготовляяй горы крепостию Своею, препоясан силою, смущаяй глубину морскую, шуму волн его кто постоит? Смятутся языцы, и убоятся живущии в концах от знамений Твоих, исходы утра и вечера украсиши. Посетил еси землю и упоил еси ю, умножил еси обогатити ю. Река Божия наполнися вод. Уготовал еси пищу им, яко тако есть уготование. Бразды ея упои, умножи жита ея, в каплях ея возвеселится возсияющи. Благословиши венец лета благости Твоея, и поля Твоя исполнятся тука, разботеют красная пустыни, и радостию холми препояшутся. Одеяшася овни овчии, и удолия умножат пшеницу, воззовут, ибо воспоют.

Слава, и ныне. Аллилуия:

Посем глаголет протодиакон ектению сию:

Миром Господу помолимся.

О свышнем мире и спасении душ наших, Господу помолимся.

О мире всего мира, благостоянии Святых Божиих Церквей и соединении всех, Господу помолимся.

О Великом Господине и Отце нашем Святейшем Патриархе Кирилле, о Преосвященных митрополитех, архиепископех и епископех, честнем пресвитерстве, во Христе диаконстве, о всем причте и людех, Господу помолимся.

О еже не в гневе прещения Своего погубити нас грех ради и беззаконий наших, но милости и щедроты Своя от века сущия помянути, и помиловати нас, Господу помолимся.

О еже не по грехом нашим воздати нам, ни по беззакониям нашим наказати нас, но по велицей милости Своей, и по многим щедротам Своим явити на нас Свое человеколюбие и благость, Господу помолимся.

О еже помянути завет Свой, иже к Ною, и не погубити нас нахождением воды, но милостивно пощадити достояние свое, Господу помолимся.

О еже благоприятным быти молитвам нашим и избавити нас от от глада, губительства, труса, потопа, огня, меча, нашествия иноплеменников и междоусобныя брани, Господу помолимся.

О избавитися нам от всякия скорби, гнева и нужды. Господу помолимся.
Заступи, спаси, помилуй и сохрани нас. Боже, Твоею благодатию.

Пресвятую, Пречистую, Преблагословенную. Славную Владычицу нашу Богородицу и Приснодеву Марию, со всеми святыми помянувше, сами себе и друг друга, и весь живот наш Христу предадим.

Архиерей: Яко подобает Тебе всякая слава, честь и поклонение. Отцу и Сыну и Святому Духу, ныне и присно и во веки веков.

Бог Господь, глас 1:

Спаси, Господи, люди Твоя:

Слава, и ныне: Тропарь иконе «Живоносный Источник»

Премудрость прости, услышим Святаго Евангелия:

Мир всем:

От Марка Святаго Евангелия чтение:

Рече Господь Своим учеником: прейдем на он пол. И отпущше народы, пояша его якоже бе в корабли: и инии же корабли бяху с ним. И бысть буря ветрена велика: волны же вливахуся в корабль, яко уже погружатися ему. И бе сам на корме на возглавнице спя. И возбудиша его и глаголаша ему: учителю, не радиши ли, яко погибаемъ? И востав запрети ветру и рече морю: молчи, престани. И улеже ветр, и бысть тишина велия. И рече им: что тако страшливи есте? како не имате веры? И убояшася страхом велиим и глаголаху друг ко другу: кто убо сей есть, яко и ветр и море послушают его?

Посем ектения сугубая:

Помилуй нас, Боже, по велицей милости Твоей, молимтися, услыши и помилуй.

Еще молимся о Великом Господине и Отце нашем Святейшем Патриархе Кирилле, о Преосвященных митрополитех, архиепископех, и епископех и всей во Христе братии нашей.

Да не потопит нас, Господи, буря водная, и да не растлиши землю, но яко Благ, мерному течению воднаго стремления с благорастворенными воздухи быти яко Силен повели, молимтися, услыши и помилуй.

Еще молимся и о еже услышати глас моления нас грешных и помиловати нас.

Услыши ны Боже:

Господу помолимся.

Таже чтется молитва от архиереа:

Зиждителю и Творче всяческих, в начале сотворивый небо и землю и воды, ихже верху Дух Божий ношашеся, и словом Твоим собравый воды поднебесныя в совокупление едино: посылаяй источники в дебрех, и посреде гор провождаяй воды, напаяющия вся звери сельныя: горькия воды при Моисеи в пустыни жезлом усладивый и жаждущия люди Своя напоивый, при Елисеи же пророце солию безчадныя воды исцеливый. Ты и ныне яко Благ и Человеколюбец, смиренно молим Тя, призри на молитву нас недостойных рабов Твоих и низпосли благословение Твое Небесное на сооружение сие и на воду в нем сущую, и Божественною Твоею силою и крепкою десницею отжени от них всякую сопротивную детель и действие диаволе, благослови и освяти их во славу Тебе Единаго в Троице славимаго Бога. Зде начальствующих и труждающихся сохрани, укрепи, научи, вразуми, спаси и защити, ангела светла посли им и благослови их во вся дни жития их.
Ты бо еси благословляй и освящаяй всяческая, и Тебе славу возсылаем, Отцу и Сыну и Святому Духу, ныне и присно и во веки веков.

Благословляется и освящается сооружение сие благодатию Всесвятаго Духа, окроплением воды сея священныя, во имя Отца и Сына и Святаго Духа.

И кропит святой водой.

Премудрость.

Отпуст по обычаю.

Пресс-служба Абаканско-Кызылской епархии